Rakhe ka Sacred Heart Girls HSS ia ka jingdap 100 snem ki Salesian Sister ha NE

Oct 19, 2023

Syllad | The Rising MeghalayaAugust 26, 2023

Ka Sacred Heart Girls Higher Secondary School ka la rakhe ia ka jingdap 100 snem (Centenary) jong ka jingwan iuh kjat jong ki hynriew ngut ki Salesian Sister ha ka Thain Shatei Lammihngi jong ka ri India (North East India) ha ka jingialang kaba la pynlong hapoh ka Hall jong ka Sacred Heart Theological College, Mawlai Phudmuri ha ka 24 tarik mynta u bnai.

Ha kane ka sngi la ia don lang ruh u Bah PT Sawkmie, u Chairman ka State Development Reform Commission, uba dei ruh u MLA barim kum u kongsan ryngkat bad u Reverend Father Richard Majaw, kum u symbud kongsan kiba la plié ia ka jingrakhe dap 100 snem.

Ka Sacred Heart Girls HSS ka la sdang ia ka prokram da ka jingleh drama kaba la jer kyrteng da ka ‘Shackles’ kaba ki khynnah ka Sacred Heart Girls’ Higher Secondary School, Mawlai ki la ak kaba la pynshoh biej ia ki paidbah kiba shong peitkai ha kane ka sngi.“Ka Sacred Heart Girls’ HSS ka la pynlong ia kane ka drama kum shi bynta jong ka jingrakhe dap 100 snem (Centenary) jong ka jingwan iuh kjat jong kitei ki hynriew ngut ki Salesian Sister ha ka Thain Shatei Lammihngi jong ka ri India, kaba ki la sdang mynta ka sngi bad kin pynkut ha ka sngi Saitjain.

Ha kane ka sngi la ia don lang ka Principal Sacred Heart Girls, ka sister Lydia Pala, ki sister, ki nonghikai, ki khynnah jong ki skul bapher bapher bad kiwei kiwei.“Katkum ka jingkren maitphang jong ka skul Sacred Heart Girls, la iathuh ba ki la don 6 ngut ki sister kiba la wan iuh kjat nyngkong ha ka thain shatei lammihngi ka India, ha u snem 1923 bad mynta ka la dap shispah snem.

Haba ai jingkren ha kane ka sngi u bah Sawkmie u la pynpaw ia ka jingsngewnguh ia ka skul Sacred Heart Girls kaba la khot sngewbha ia u sha kane ka prokram.“U la pyrto ia ka kam ki sister kiba la aiti la ka jingim ban shakri ia U Blei, wat hapdeng bun ki diengpyngkiang bad ki jingeh ba ki mad ha ka jingiaid lynti jong ki.

Ha kajuh ka por u la iaroh ruh ia ka drama ba ki khynnah skul ki la ak kaba long katkum ka juk mynta, ha kaba bun ki khynnah, ki samla, ki ju ngat ha ka jingshah khaii.“La ioh ruh ia ka jingkren na u Reverend Father Richard Majaw, uba pynpaw ba ki sister ki la wan sha kane ka thain ban kyntiew ia ka pule puthi, ka imlang sahlang, khamtam ha ka kam shakri ia U Trai.